用过夜膳，想起阿二服药之后不知怎生模样，便唤阿珠来问。阿珠方从楼下上来，回答道：“吃仔药下去不过实梗，眼睛门前看勿出啥好歹，横势今朝一夜天，叫几个相帮轮流陪俚，大先生，放心点末哉，谅来勿碍得格。”阿金也道：“作兴药性发作慢点格，勿要去愁俚，放开怀抱，早点困，倪前两日勒船浪，一连辛苦仔几夜，今朝总要好好能养息养息格哉。勿说大先生千金身体磨坏仔末哪哼，就是我搭珠姐也降（读杭）勿落。加二明朝要去烧香，亦要起早起格，格落我劝甩开点念头，马上就安置罢。”宝玉道：“故歇辰光，不过毛十记钟，有客人来格勒，哪哼好就困嗄？”阿金道：“管俚做啥？到底勿比得格辰光自家挂牌子，应该要巴结点，故歇是两样格哉，高兴末陪陪俚笃，勿高兴末让俚乞希，自有小先生勒浪承值，如果小先生出仔堂差，勿勒屋里，也有俚笃格人勒浪招呼，连倪才用勿着格。大先生，奈想阿对勒勿对佬？”宝玉道：“格闲话是勿差，阿晓得奴勿实梗，落里来外快洋钿嗄？”说着，即在怀中取出方才所得的五十元，安放枕边。可见得宝玉是个极贪的人，当时何以推辞？一来有意要笼络他，欲显自己的大方；二来区区五十元，尚不足以动其心，欲得他的大注财爻，故尔十分做作。若说真真不贪，则不像胡宝玉的为人；说得过于贪小，又不像九尾狐的手段，在下所以不得不表，幸勿以琐屑嗤之。且说阿金与阿珠看宝玉藏好银洋，都说道：“洋钿要紧，身体更加要紧，大先生看穿仔点罢。”宝玉方始应允，即便卸妆而睡，究竟连日辛苦已极，横到床上就睡熟了。阿金、阿珠也去安寝。至于玉莲等房内各事，书中均不一一交代，以免丛杂。